ლიზლი-ავერსი LIZLY-AVERSI

ზოგადი დახასიათება:

საერთაშორისო არაპატენტირებული დასახელება: ამბროქსოლი;

ძირითადი ფიზიკურ-ქიმიური თვისებები:

უფეროდან მოყვითალო ფერამდე, გამჭვირვალე სითხე მოტკბო გემოთი;

შემადგენლობა:

სიროფის 5 მლ შეიცავს:

ამბროქსოლის ჰიდროქლორიდს – 15 მგ. 

დამხმარე ნივთიერებები: ნატრიუმის ბენზოატი, ნატრიუმის საქარინი, საქაროზა, თხევადი სორბიტოლი 70%, პროპილენგლიკოლი, სორბინის მჟავა, გლიცერინი, ლიმონმჟავა უწყლო, ნატრიუმის ციტრატი, ფორთოხლის არომატიზატორი, გასუფთავებული წყალი.

გამოშვების ფორმა:

სიროფი, 15 მგ/5 მლ.

ფარმაკოლოგიური ჯგუფი:

მუკოლიზური და ამოსახველებელი საშუალება.

ათქ-კოდი: R05CB06

ფარმაკოლოგიური თვისებები:

ამბროქსოლის ჰიდროქლორიდი ბრომჰექსინის აქტიური მეტაბოლიტია, რომელიც ხასიათდება მუკოლიზური და ამოსახველებელი მოქმედებით. პრეპარატი ასტიმულირებს ბრონქების ლორწოვანი გარსის ადენოციტების მიერ სეკრეტის გამოყოფას. იგი ააქტივებს ჰიდროლიზურ ფერმენტებს და აძლიერებს ლიზოსომების გამოთავისუფლებას კლარის უჯრედებიდან, რაც იწვევს ბრონქულ სეკრეტში მჟავე მუკოპოლისაქარიდების დაშლას. ამბროქსოლის ჰიდროქლორიდი აძლიერებს სურფაქტანტის წარმოქმნის პროცესს ალვეოლებსა და ბრონქებში, აუმჯობესებს ბრონქული სეკრეტის რეოლოგიურ მაჩვენებლებს, ამცირებს მის სიბლანტესა და ადჰეზიურ თვისებებს. პრეპარატი ასტიმულირებს ბრონქების მოციმციმე ეპითელიუმის წამწამების მოძრაობას, რაც ხელს უწყობს ნახველის ევაკუაციას, ამცირებს ბრონქების სპასტიკურ ჰიპერრეაქტიულობას.

ფარმაკოკინეტიკა:

ამბროქსოლი სწრაფად და თითქმის მთლიანად შეიწოვება კუჭ-ნაწლავის ტრაქტიდან. მაქსიმალურ კონცენტრაციას პლაზმაში  1-2.5 სთ-ში აღწევს. პრეპარატის  ბიოშეღწევადობა შეადგენს დაახლოებით 70-80%-ს. პლაზმის ცილებს უკავშირდება პრეპარატის დაახლოებით 90%. ამბროქსოლი გადის ჰემატოენცეფალურ და პლაცენტურ ბარიერებს, გადადის დედის რძეში. პრეპარატი პირველად მეტაბოლიზმს განიცდის ღვიძლში არააქტიური კონიუგატების  (დიბრომანტრანილის მჟავა, გლუკურონიდები) წარმოქმნით. ორგანიზმიდან გამოიყოფა თირკმლების საშუალებით: 90% – მეტაბოლიტების სახით, 10% – უცვლელი სახით. T_1/2 შეადგენს დაახლოებით 10 სთ-ს.

ჩვენება:

სასუნთქი სისტემის მწვავე და ქრონიკული დაავადებები, რომელთაც თან ახლავს ნახველის გაძნელებული გამოყოფა: მწვავე ბრონქიტი, ქრონიკული ბრონქიტის გამწვავება, ასთმური ბრონქიტი, ბრონქოექტაზიური დაავადება, პნევმონია, ბრონქული ასთმა, ფილტვების ქრონიკული ობსტრუქციული დაავადება; რინოფარინგეალური ტრაქტის ანთებითი დაავადებები: ლარინგიტი, ფარინგიტი, სინუსიტი, რინიტი (კომპლექსური თერაპიის შემადგენლობაში).

მიღების წესი და დოზირება:

მოზრდილებსა და 12 წელზე მეტი ასაკის ბავშვებში მკურნალობის დაწყებიდან პირველი 2-3 დღის განმავლობაში რეკომენდებულია 10 მლ 3-ჯერ დღეში, შემდეგ - 10 მლ 2-ჯერ. მოზრდილებში შესაძლებელია 20 მლ-ის მიღება 2-ჯერ დღეში თერაპიული ეფექტის გასაძლიერებლად.

5-დან 12 წლამდე ასაკის ბავშვებში რეკომენდებულია 5 მლ 2-3-ჯერ დღეში.

2-დან 5 წლამდე ასაკის ბავშვებში რეკომენდებულია 2.5 მლ 3-ჯერ დღეში.

2 წლამდე ასაკის ბავშვებში ინიშნება 2.5 მლ 2-ჯერ დღეში.

სიროფი მიიღება ჭამის შემდეგ საკმარისი რაოდენობის სითხესთან ერთად, რაც ხელს უწყობს პრეპარატის მუკოლიზური მოქმედების გაძლიერებას.

თირკმლის მწვავე უკმარისობის ან ღვიძლის ფუნქციის მძიმე დარღვევის შემთხვევაში საჭიროა პრეპარატის დოზის შემცირება ან მიღებებს შორის ინტერვალის გაზრდა.

მკურნალობის ხანგრძლივობა განისაზღვრება ინდივიდუალურად ექიმის მიერ და დამოკიდებულია ავადმყოფობის სიმძიმის ხარისხზე. პრეპარატის ხანგრძლივად გამოყენება საჭიროებს ექიმის მეთვალყურეობას.

გვერდითი მოვლენები:

საჭმლის მომნელებელი სისტემის მხრივ: გულისრევა, ღებინება, გასტრალგია, პირის სიმშრალე, დიარეა და სხვა დისპეფსიური მოვლენები;

სასუნთქი სისტემის მხრივ: სასუნთქი გზების ლორწოვანი გარსის სიმშრალე, რინორეა, დისპნოე;

ნერვული სისტემის მხრივ: დისგევზია (გემოს შეგრძნების დარღვევა);

იმუნური სისტემის მხრივ: გამონაყარი კანზე, ქავილი, ჭინჭრის ციება, ანგიონევროზული შეშუპება, ანაფილაქსიური ტიპის რეაქციები (მათ შორის, ანაფილაქსიური შოკი).

იმ შემთხვევაში, თუ გამოვლინდა ისეთი გვერდითი მოვლენა, რომელიც არ არის აღნიშნული გამოყენების ინსტრუქციაში, პაციენტმა უნდა მიმართოს მკურნალ ექიმს.

უკუჩვენება:

მომატებული მგრძნობელობა პრეპარატის შემადგენელი ნებისმიერი კომპონენტის მიმართ.

ურთიერთქმედება სამკურნალო საშუალებებთან და სხვა სახის ურთიერთქმედება:

ამბროქსოლი ხელს უწყობს ბრონქების ლორწოვან გარსსა და ბრონქულ სეკრეტში  ანტიმიკრობული საშუალებების (ამოქსიცილინი, ცეფუროქსიმი, ერითრომიცინი,  დოქსიციკლინი, სულფანილამიდები) შეღწევას.

არ არის რეკომენდებული პრეპარატის გამოყენება ხველის საწინააღმდეგო საშუალებებთან (მათ შორის, კოდეინთან) ერთად, რადგან ხველის შესუსტება აფერხებს ნახველის გამოყოფას.

ჭარბი დოზირება:

დოზის გადაჭარბების სპეციფიკური სიმპტომები არ არის ცნობილი. ჭარბი დოზის მიღების ან/და პრეპარატის შეცდომით გამოყენების დროს გამოვლენილი სიმპტომები შეესაბამება ცნობილ გვერდითი მოვლენებს და საჭიროებს სიმპტომური თერაპიის ჩატარებას.

ორსულობა და ლაქტაცია:

ამბროქსოლი გადის პლაცენტურ ბარიერს, ამიტომ პრეპარატის გამოყენება ორსულობის პერიოდში (განსაკუთრებით I ტრიმესტრში) არ არის რეკომენდებული. პრეპარატი გადადის დედის რძეში, რის გამოც მკურნალობის პერიოდში საჭიროა ძუძუთი კვების შეწყვეტა.

განსაკუთრებული მითითებები:

კუჭისა და თორმეტგოჯა ნაწლავის წყლულოვანი დაავადების დროს საჭიროა პრეპარატის მიღებისგან თავის შეკავება.

ლიზლი-ავერსი სიფრთხილით გამოიყენება თირკმლის ფუნქციის დარღვევის ან/და ღვიძლის მძიმე დაზიანების შემთხვევაში; ასევე მოტორული ბრონქოპათიის დროს, ვინაიდან მოსალოდნელია ნახველის ევაკუაციის შეფერხება.

პაციენტი უნდა იყოს ინფორმირებული, რომ მდგომარეობის გაუარესების შემთხვევაში საჭიროა მიმართოს ექიმს.

პრეპარატი შეიცავს საქაროზას, ამიტომ მისი გამოყენება არ არის რეკომენდებული ფრუქტოზას მიმართ აუტანლობის, საქარაზა-იზომალტაზას უკმარისობის და გლუკოზა-გალაქტოზური მალაბსორბციის სინდრომის მქონე პაციენტებში.

პრეპარატის ზემოქმედება ავტოტრანსპორტისა და მექანიზმების მართვის უნარზე:

პრეპარატი არ მოქმედებს სატრანსპორტო საშუალებების მართვის უნარსა და  ყურადღების კონცენტრაციაზე.

შეფუთვა:

100 მლ სიროფი ნარინჯისფერ პოლიმერულ ფლაკონში საზომი ხუფით, თითო ფლაკონი მუყაოს კოლოფში.

შენახვის პირობები:

ინახება არა უმეტეს 25ºC ტემპერატურაზე სინათლისაგან დაცულ და ბავშვებისათვის მიუწვდომელ ადგილას.

ფლაკონის გახსნის შემდეგ სიროფი ვარგისია გამოყენებისათვის 30 დღის განმავლობაში.

ვიზუალური დათვალიერების შედეგად აღმოჩენილი რაიმე სახის დეფექტის შემთხვევაში პრეპარატის მიღება დაუშვებელია.

ვარგისობის ვადა:

2 წელი. შეფუთვაზე აღნიშნული ვადის გასვლის შემდეგ პრეპარატის გამოყენება დაუშვებელია.

აფთიაქიდან გაცემის პირობა:

ფარმაცევტული პროდუქტის ჯგუფი III, გაიცემა რეცეპტის გარეშე.

მწარმოებელი:

შპს “ავერსი-რაციონალი” (საქართველო).

მისამართი:

საქართველო 0198, თბილისი,

ჭირნახულის ქ. 14.

www.aversi.ge